|
20.07.2020
BATIK & BEAUTYUm 13:00 Auer ass Treffpunkt am Jugendhaus zu Ettelbréck. Hei maache mir eis eegen T-Shirten am ugesote Batiklook. Du kanns deng eege wäiss Kotténgs T-Shirten, Pulloveren, Strëmp asw matbréngen, oder kriss d’T-Shirten vun der Nordstadjugend. An dann kanns du denger Kreativitéit fräie Laf loossen an deng ganz individuell Kleeder gestalten. Wärend deem kann och nach jidderee seng eege Beautyprodukter op nohalteg Aart an Weis maachen. Dat ganz dauert bis 18:00.
|
22.07.2020
FIFA-LIGAUm 13:00 ass Treffpunkt zu Ettelbréck am Jugendhaus. Hei ginn ofwiesselend Matcher vun 10 Minutten 1 géint 1 gespillt, bis mer no insgesamt 9 Matcher ee Gewënner definéieren. Nieft vill Spaass an Spannung, sinn och flott Präisser garantéiert.
|
|
24.07.2020
OUTDOORSPILLER MAM LUDOBUSUm 14:00 ass Treffpunkt am Jugendhaus Ettelbréck. Vun do aus fuere mir mat eisem Minibus an eisem Ludobus (Spillbus) op Beefort. Do spille mir verschidden Outdoorspiller, bis mir da fir 17:00 rëm zeréck op Ettelbréck fueren. Fir eng kleng Iwwerraschung ass natierlech och gesuergt.
|
28.07.2020
BODYCULTUm 14:00 treffe mir eis beim Dikrecher Jugendhaus, bis 18:00 beschäftege mir eis mam Thema Sport an Ernierung. Nodeems mir eis bei engem ofwiesslungsräiche Crossfit-Training vun zwee zertifiéierten Traineren ausgepowert hunn, stäerke mir eis mat gesonde Snacks an tauschen eis iwwert Sport, Ernierung a Kierperbiller bei enger flotter Diskussiounsronn aus. Dës Aktivitéit ab 14 Joer.
|
|
29.07.2020
VISITT VEIANENUm 10.00 ass Treffpunkt zu Dikrech op de Gare, vun do aus fuere mir mam Minibus op Veianen a maachen eis zu Fouss op de Wee laanscht d’Our op Stolzebuerg (+/- 8,4 km). Ënnerwee maache mir e puer flott Spiller an et gëtt fir jiddereen eng Fruppstuut. Vu Stolzebuerg fuere mir nees mam Bus zeréck op Veianen. Do fuere mir mam Sessellift erop an iessen eng Glace. Da gi mir zu Fouss erof bei eise Minibus a fuere fir 17:00 zeréck op Dikrech.
|
31.07.2020
STAND-UP PADDLE & FLOOSSUm 8:30 treffe mir eis zu Dikrech op der Gare, vun do aus fuere mir mam Minibus zesummen op Lëlz op d‘ Base nautique vum SNJ, wou mer moies zesummen ee Flooss bauen a Mëttes mam Standup Paddle de Stau entdecken. Iwwert d’Mëttesstonn stäerke mir eis bei engem Iessen an der Jugendherberge. Fir 17:30 komme mir rëm zu Dikrech op der Gare un.
|
|
04. & 05.08.2020
NOJU-TRIATHLONPrett fir e klengen Triathlon?
Um 10 Auer treffe mir eis beim Jugendhaus zu Dikrech fir da mam Velo (Rent-a-Bike) vun Dikrech op Wallendorf-Pont ze fueren (11km). Vun Déiljen aus geet et weider mam Kanu bis op d’Iechternacherbréck (14 km), wou mir an der Jugendherberg zesummen iessen an e flotten Owend mat Spiller verbréngen, an iwwernuechte wäerten. Den Dag duerno ginn d’Féiss an de Grapp geholl a mir ginn duerch Bësch, Fielsen an Hielen bis op Beefort (15 km), ënnerwee maache mir eng Paus wou mir eis mat enger Fruppstutt rëm stäerken. Hei wäerte mir no 2 laangen Deeg, ausgepowert de Bus zeréck op Dikrech huelen. |
07.08.2020
KAYAKUm 8:30 ass Treffpunkt op der Dikrecher Gare, vun wou aus mir mat eisem Minibus zesummen op Lëlz, op d’Base nautique vum SNJ fueren. Do kréien mir eng encadréiert Kayak-Aktivitéit vum SNJ ugebuede No engem klenge, gemeinsame Mëttesiessen genéisse mir nach d’Sonn um Stau a maachen e puer Spiller, éier mir eis nees fir 17:00 op den Heemwee, zeréck op Dikrech maachen.
|
|
11.08.2020
WALK & SWIMUm 10:30 ass Treffpunkt zu Ettelbréck am Jugendhaus, vun do aus maache mir eis mat eisem Minibus op Kauneref. Ze Fouss maache mir e klenge Walk vun 3 km duerch de Bësch vu Kauneref op Léifreg. Op der Plage zu Léifreg kënne mir wärend 4 Stonnen schwammen, chillen an d’Natur genéissen, bis mir eis duerch de Bësch zeréck bei eise Minibus op Kauneref maachen an fir 17:30 dann rëm zu Ettelbréck sinn. Fir z'Iessen ass gesuergt.
|
13.08.2020
TRAUMSCHLEIFE PALMBERG AHNUm 13:00 ass Treffpunkt beim Dikrecher Jugendhaus, vun do aus fuere mir mat eisem Minibus op Ohn. Do maache mer zesummen e Premiumwandertour vun 9 km duerch a ronderëm d‘Wënzerduer. Wäibierger, herrlech Aussiichten iwwert d’Museldall, Naturschutzgebidder, Orchideeën, Waasserfäll a Schluchten si garantéiert. Fir 19:00 ass Retour beim Dikrecher Jugendhaus.
|
|
14.08.2020
SURPRISE, SURPRISEUm 13:00 ass Treffpunkt beim Jugendhaus zu Ettelbréck. Weider dierf een näischt soen, wéi den Numm et seet: et ass eng Iwwerraschung, déi et awer derwäert ass. Sech op d'Stéchwierder: Panorama an 42 m Héicht, baséieren a sech iwwerrasche loossen, heescht et hei. De Retour ass um 18:30 zu Ettelbréck beim Jugendhaus.
|